काठमाडौं । नेपाल मेडिकल कलेजले ठूलो संख्यामा विशेषज्ञ चिकित्सकको माग गरेको छ । अत्तरखेल काठमाडौंमा रहेको मेडिकल कलेज (शिक्षण अस्पताल)ले एक सूचना प्रकाशित गरी विभिन्न विषयगत क्षेत्रका विशेषज्ञ चिकित्सकहरुको माग गरेको हो ।
कलेज प्रशासनद्वारा प्रकाशित सूचना अनुसार इन्टरनल मेडिसिन, कार्डियोलोजी, पल्मोनोलोजी, न्यूरोलोजी, ग्यास्ट्रोइन्ट्रोलोजी, नेफ्रोलोजी, क्रिटिकल केयर, एनेस्थेसियोलोजीमा प्रोफेसर, एशोसिएट प्रोफेसर, असिस्टेन्ट प्रोफेसर र लेक्चर माग गरिएको छ ।
यस्तैगरी स्त्री तथा प्रसुति रोग, दन्त रोग, बाल रोग, ट्रान्सप्लान्स फिजिसिएन लगायतका पदहरुमा पनि दरखास्त माग गरिएको छ । कलेजको स्वास्थ्य सेवालाई प्रभावकारी बनाउन दक्ष जनशक्ति थप गर्ने निर्णय अनुसार चिकित्सकहरु माग गरिएको जनाएको हो ।
योग्यता पुगेका चिकित्सकहरुले इमेल मार्फत आफ्नो व्यक्तिगत विवरणसहित आवेदन दिन सक्नेछन् । दरखास्त दिने अन्तिम दिन फागुन ११ गते रहेको छ । कलेजले दरखास्त दिएका मध्येबाट सर्ट लिस्टमा परेकाहरुलाई अन्तरवार्ताका लागि बोलाउने पनि जानकारी गराएको छ ।
.jpg)
