- केके मानन्धर
येँ । नेपाल भाषा, साहित्य, सङ्गीत व पत्रकारिता ख्यलय् थ:गु मूवंगु ई बियाः थुगु ख्य:यात चकंकेगु अले च्वन्ह्याकेगु ता:तयाः जिवनया ज्वःमदुगु ई पानादीपिं सर्जकपिंत हःपाः बिइकथं हनेगु तातुना पलिस्था जूगु गणेशदेवी मानन्धर स्मृति प्रतिष्ठानया निक्वगु दँया न्हापांगु साहित्यिक एवं साङ्गितिक सम्म्मान थ्वहे २०८० जेष्ठ ६ गते शनिबार मरुहितिया भौकेब:पार्टी पेलेसय् जुई त्यंगु दु ।
फाण्डेशनया परामर्श समितिया संयोजक वरिष्ठ संकिपा निर्देशक हनेबहम्ह भाजु पवन जोशी व वय्कया सहयोगी वरिष्ठ गायिका, नायिका अले नृत्यङ्गाना मयजु नगिना जोशी, वरिष्ठ संगीतकार सुरेन्द्र श्रेष्ठ, वरिष्ठ पत्रकार दर्शन वीर शाक्य व वरिष्ठ लोकंह्वाःम्ह गायिका निशा देशारपिनिगु निर्णय कथं थुगुसी दीर्घ प्रतिभा सम्मान करिब खुगु दशकनिंसे भाषा, साहित्य, गायन व नाटक ख्यलय् थ:गु जीवन पाना दीम्ह भृगु राम श्रेष्ठयात बिइगु क्वःजित । अथेहे नेपालभाषाया संकिपा क्षेत्रयात निरन्तर न्ह्याकेया लागि दकले न्हांपाम्ह पत्रकार जुयाः अग्रणी भुमिका म्हितादीम्ह विजयरत्न असंबरेयात पत्रकारिता पुरस्कार नापं नेपालभाषा ख्यलय् बिस्तारं त्वयावम्ह लोकंह्वाम्ह, अतिकं बांलाक्क म्ये हालीम्ह सिद्धार्थ बज्राचार्ययात उदियमान म्ये हालामिया पुरस्कारं सम्मान याइगु जुल ।
समाजसेवी विजय कुमार मानन्धरया अध्यक्षताय् जुइत्यंगु थ्व सम्मान कार्यक्रमया संरक्षक दीवंगत गणेशदेवीया माइलाम्ह काय् राजेश मानन्धरनापं वयकया दाजु प्रा.डा. राजु मानन्धर(थौं कन्हय् अष्ट्रेलियाय् च्वनादी) किजा उपप्राध्यापक सज्जु मानन्धरया म्ह्याय् सुनिता मानन्धर र परिवारया सकल ज:पिनिगु ईच्छा कथं थ्व संस्था पलिस्था जूगु खः ।